kontaktua
2014.06.19

Arratiako irudiak postalen bidez

Arratia posta txartelean izenburuko liburua atera barri dau Jo Urrutxurtu zeaniztarrak. Bagilaren 20an aurkezpena egingo dabe Igorreko Lasarte kultur aretoan.

Liburuan 89 posta-txartel batu ditu, danak Arratiako bizimoduaren erakusgarriak, XX. mendearen hasieratik 1950eko hamarkadara arte editautakoak.

Hiru gai-multzotan banatu ditu egileak txartelok:

Alde batetik tipoei buruzkoak eta ohitura posta txartelak; hau da, pertsonaiak euren ohiko jantziakaz agertzen direnak, baserriko lanak egiten kasurako, edo karta edo bola jokoan.

Beste gai bat tokiko bistei jagokena da (izaki bizidunakaz edo hain barik). Holangoetan paisaiak eta eraikinak datoz, eta baliteke batzutan jentea be ikustea.

Hirugarren multzoan publizidade posta txartelak sartzen dira, enpresa, alkarte edo erakunde baten jarduera ezagutzera emotekoak; kasurako, Areatzako bainuetxeak eta Arteako Seminario Txikiak argitaratuak, baita Bizkaiko Foru Aldundiak auzo-eskolak ezagutzera emoteko editaukoak be.

Lan ederra eta interesgarria, duda barik.

Esatekoak 0
Ikusita: 693
2014.06.13

Zuztarluze leihaketa Galdakaon

Zuztarluze izeneko txapelketa Galdakaoko Udaleko Hezkuntza eta Euskara Arloak antolatu dau bigarrrenez aurten. Berez, formatu aldetik EITBko Mihiluze saioaren antzekoa da, baina eduki aldetik gure ingurune eta ondareari egokituta dagoen txapelketa da.

Izan be, Galdakaoko Udalak, Nerbioi Ibaizabal eskualdeko beste zortzi udalegaz batera, Zuztarretatik ahora ikerketa-egitasmoa ipini eban martxan 2006ko urtean, gure ahozko ondarea eta etnografikoa batu eta sailkatzeko, eta datuokaz hainbat jarduera eta produktu ondu dira urteokaz: eskola agendak, kantuen CDak, DVD interaktiboak, bideoak… Guztiaren barri www.zuztarretatikahora.com helbidean dago.

Aurtengo II. txapelketa udalerriko eskola eta institutuakaz batera antolatu da, eta zentroetako kanporaketak egin ostean, bagilaren 13an finala jokatuko dabe.

Ekitaldi horretan ikasleek egindako lana ikusi ahal izango da, udalerriko ikastetxeen lankidetzagaz, ikuspuntu pedagogiko eta linguistiko baten aldetik, helburu argi eta zehatz bategaz.

Harrera ezin hobea izan dala aitortu behar da, zentroen inplikazinoa be oso-osokoa, eta ikasleen artean gure bizimoduaren eta hizkuntzaren ganean ikasteko gogoa bizi-bizia.

Esatekoak 0
Ikusita: 683
2014.06.06

Liburu azoka Bilbon

Bilboko Arenalean dago aurten be liburu-azoka ekainaren 8ra arte. Urtero legez, hainbat erakusgarri dagoz: argitalpen barriak, lehenagokoak, generoka, eta abar.

Baina Azokak beste gauza askorako be emoten dau, ez da bakarrik liburuak ikusi eta erosteko. Idazleakaz topaketa interesgarriak dagoz, idazleak eurak liburuak sinatzen, mahai-inguruak, aurkezpenak… literaturaren ganeko ekitaldi asko eta interesgarriak.

Azoka horretan urtero banatzen dabe Urrezko luma saria. Aurten Galtzagorri Elkarteari emon deutsie, ume eta gazteentzako literaturaren alde egiten daben lanagaitik.

Zazpi kale saria, ostera, Miren Agur Meaberi emon deutsie, iaz gehien saldu zan liburuagaitik, Kristalezko begi bat izenburukoa. Aurten erderaz argitaratu dau liburu hori.

Esatekoak 0
Ikusita: 526
2014.05.23

Herriko toponimia eta ondarea ezagutzen

Getxoko Udaleko euskara zerbituak herriko toponimia ezagutzera emoteko ibilbideak eratu ditu parte hartu gura daben guztientzat. Lau ibilbideren bitartez, herriko lekurik esanguratsuenak erakutsi eta lekuan-lekuko izenak nondik datozen, zer esan gura daben eta abarrak azalduko deutsez gidari batek.

Ibilbideon helburua herriko ondarearen barri zabaltzea da, hizkuntzaren ikuspegitik ezeze kultura eta natura aldetik be.

Ibilbideak doakoak dira, gura dauenak izena emon baino ez dau egin behar. Ha ta guzti be, eskola eta euskaltegientzat taldeak osotu eta eurentzat egunak ipinteko aukerea be badago.

Ibilbideak hiru bat ordukoak dira, eta bakotxak inguru bat hartzen dau.

Lehenengoa Bolueko Hezeguneak ezagutzeko da. Fadurako Kiroldegian hasita, Boluntzarreta errotea ikusi, Santa Koloma auzoa eta Larrañazubi eta Errotazarreko aldea hartzen ditu. Hori maiatzaren 10ean izan da.

Bigarrena maiatzaren 24an izango da, Portu Zaharreko Etxetxu plazan hasita kostaldea ezagutzeko: Usategi, Arrigunaga eta Aixerrota, besteak beste.

Bagilaren 7an, Getxo barria ezagutuko dabe parte-hartzaileek Neguriko Karmengo eleizatik urtenda.

Laugarrena, bagilaren 21ean, Andra Mariko eleizan urten eta betiko Getxotik bizikletaz ibiliko dira.

Esatekoak 0
Ikusita: 577
2014.05.16

Julen Gabiria nederlanderaz

Julen Gabiria idazlearen Han goitik itsasoa ikusten da nederlandera itzulita argitaratu dau Zirimiri press argitaletxeak Van daarboven zie je de zee izenburuagaz.

Laster dira liburua Holandan aurkezteko; hori dala-ta, Julenek erronka bat jarri deutso bere buruari: Gernikatik Amsterdamera bizikletaz joatea, hamabost eguneko ibilaldian.

Horretarako laguntzak be topau ditu, eta Twuiter eta Facebooken jarraitzeko aukerea dago.

Esatekoak 0
Ikusita: 605