kontaktua
2013.10.03

Lauaxeta Olerki Leihaketa 2013

Mungiako Udalak aurten be olerki-lehiaketa eratu dau, Lauaxeta herriko poeta handiaren omenez. Aurten “Itauna … Erantzuna” izenburua ezarri dabe parte hartuko daben idazlan guztientzat. Gaia nahi dan eran landu eta asmau ahal izango da, baina izenburu horretara egokituta.

100 eta 200 bertso-lerro bitartean euki behar dabez idazlanok, beti be euskeraz idatzita eta originalak direla.

Lanak zemendiaren 13ra arte aurkeztu ahal izango dira eta sari bi egongo dira, 800 eta 500 eurokoak.

Esatekoak 0
Ikusita: 541
2013.09.27

Bertsolari Txapelketa Nagusia irailaren 29tik aurrera

Irailaren 29an hasiko da aurtengo Bertsolari Txapelketa Nagusia Euskal Herri osoko 43 bertsolarik parte hartzen dabela. Finala abenduaren 15ean jokatuko da Barakaldon, BECen.

Sei kanporaketa eta zazpi finalaurreko egingo dira. Hamaika bizkaitar igongo dira oholtzara, Arkaitz Estiballes, Beñat Ugartetxea, Etxahun Lekue, Fredi Paia, Igor Elortza, Iratxe Ibarra, Jone Uria, Miren Amuriza, Oihana Bartra, Onintza Enbeita eta Unai Iturriaga. Arabatik bertsolari bi izango dira; Gipuzkoatik, 21; Nafarroatik, 4; eta 5, Lapurditik.

Txapelketea Internetez segidu ahal izango da, helbide bi honeetan: www.bertsozale.com eta www.bertsoa.com.

Esatekoak 0
Ikusita: 595
2013.09.13

Irakurle kluba euskeraz

Bizkaiko Foru Aldundiko Liburutegiak Irakurle Taldea sortzeko egitasmoa jarri dau martxan uda oste honetarako. Euskerazko literatur lanak irakurri eta lanok komentatzea izango da jarduera. Helburua da parte-hartzaileek euskeraz irakurteaz gozetea, irakurzaletasuna indartzea eta euskal literatura gehiago ezagutzea. Julen Gabiria izango da dinamizatzailea, eta saioak irailaren 12tik zemendiaren 14ra bitartean, eguenetan, 18:00etatik 20:00etara, egingo dira, danak euskeraz.

Esatekoak 0
Ikusita: 704
2013.07.24

'Bermeotarrak XX. mendean, Anton Ormazaren sasoia'

Anton Ormaza enpresagizon, euskalzale eta gizarteko ekintzailearen irudia gogoratuko dabe egunotan Bermeon. Baina ez harena bakarrik, bere bitartez Bermeok XX. mendean egin dauen ibilbidea ezagutzeko erea eukiko dabe bermeotarrek eta hara hurreratzen diran guztiek.

Helburua lortzeko, erakusketa bat zabaldu dabe Arrantzale Museoan, eta hitzaldiak egingo dabez uztailaren 24tik abuztuaren 1era bitartean. Politika, arrantza eta euskerea gai hartuta, hitzaldi eta mahai-inguruak egingo dira iluntzeko 7:00retan hilaren 24, 29 eta 1ean. Euskeraren ganekoan, parte hartuko dabe Edorta Jimenez eta Adolfo Arejitak, abuztuaren 1ean.

Esatekoak 0
Ikusita: 663
2013.07.19

Jabier Kalzakorta euskaltzain oso barria

Jabier Kalzakorta (Markina, 1961) euskaltzain oso aukeratu dabe gaur, uztailaren 19an, Euskaltzaindiko batzar osoan. Jose Luis Lizundia emeritu egin orduan geratutako hutsunea beteko dau Jabierrek.

Lehenago be parte hartu izan dau Kalzakortak Euskaltzaindian, euskaltzain urgazlea da eta Herri Literatura Batzordeko kidea.

Jabier Kalzakorta euskal hizkuntza eta literaturako aiturik handienetakoa dogu gure artean gaur egun, eta herri literaturan puntarengoa. Deustuko Unibersidadean emoten ditu eskolak, baina ikerketan murgilduta bizi da. Lanetako asko Labayru Ikastegian argitaratu ditu, gaztetatik daukalako lotura estua gure erakundeagaz.

Ikerketa-arloak herri literaturagaz lotutakoak ditu: euskal baladak, euskal eta europar paremiologia, ipuin eta narrazino laburrak, Euskal Herrikoak zein Europako eta Amerikako beste herrialde batzuetakoak.

Hainbat argitalpen egin ditu, dala edizino kritikoak, dala argitaratubako eskuidatzien inguruko materialez, dala han-hor-hemen erdi galduta dagozan paper eta antzekoak errekuperatzen.

Artikuluetan kantu, kopla, ipuin eta abarrak berreskuratzen aparteko ekarpena egin dau, baita testuon idazkera finkatzen be. Herri hizkera ederto menperatzen dau, literatura klasikoaz gainera.

Hainbat aldizkaritan dago erredazino-taldean, literatura eta paremiologia gaietan. Instituto Cervantes erakundeko Refranero Multilingüe proiektuko euskal ordezkaria da, euskal paremia ordainen sailaren arduraduna 2000 urtetik aurrera.

Esatekoak 0
Ikusita: 560