kontaktua
2015.09.25

Burdina gure ondarean

Burdina izango da aurten Ondarearen Europako jardunaldietako ardatza. Ondarean burdinagaz lotutako hainbat jarduera, ondasun, lanbide, esku-lan, diru-iturri egon izan dira. Gai nagusi horren inguruan, urrian zehar Bizkaiko herri gehienetan hainbat ekintza eta jarduera egingo dira: hitzaldiak, bisita gidatuak, tailerrak, bideo-emonaldiak, eta abar.

Programea aurkeztu dabe eta sarean dago eskura.

Gure kultura, gure historia eta gure ondarea gehiago ezagutu gura dauenak hor dauka plan ezin hobea.

Esatekoak 0
Ikusita: 894
2015.09.11

'Emakumeak eta literaturea: komikiak eta generoa' jardunaldiak

Josune Muñozek gidatuta, 'Emakumeak eta literaturea: komikiak eta generoa' jardunaldiak egingo dira Bilboko Foru Liburutegian irailaren 15etik aurrera. Tailer honetan komikiak generoaren ikuspegitik aztertuko dabez. Bertan komikien estilo eta azpigeneroak bereizten ikaiko dabe, alde batetik; baina komikietan irakurketa kritikoa egiteko bidera be eragin gura dabe. Horrezaz ganera, komikien lehenagoko eta oraingo joerak hurreratzeko saioa egingo dabe.

Jardunaldiak irailaren 15etik abenduaren 29ra arte, martitzenetan izango dira, 18:00etatik 20:00etara, Foru Liburutegiko 5. solairuko Tailerren Gelan eta Hitzaldi Aretoan.

Tailerra dobakoa da, baina izena emon behar da, bai liburutegian bertan bai telefonoz edo posta elektronikoz.

Esatekoak 0
Ikusita: 884
2015.09.04

Ipuin Lehiaketa Portugaleten

Honezkero hogeta bost urteko ibilbidea egin dau Portugaleteko Udalak eratzen dauen ipuin lehiaketak. Aurten XXV Ipuin Lehiaketa “Portugalete Uri Urena” deitu barri dau.

Kategoria bitan parte hartu daiteke, adinaren arabera: 14-17 urte bitartekoak alde batetik, eta 18-29 bitartekoak bestetik.

Gaia librea da, baita hizkuntza bere; hau da, euskeraz zein gaztelaniaz idatzita parte hartu daiteke. 15 orriko luzera jarri dabe muga.

Maiatzaren 4era arteko epea dago lana Udaletxean aurkezteko. Sari nagusi bat dago, 1.500 eurokoa, eta kategoria bakotxeko beste hiruna sari.

Esatekoak 0
Ikusita: 785
2015.07.29

Aurtengo pastorala Pierra Lhanderi buruz

Urtero legez, aurten be Zuberoan pastorala egingo da. Aurten Pierra Lhande hartu dabe gaitzat, personaje historiko horren bizitzan oinarrituta.

Agerraldi bi egingo dira, bata uztailaren 26an eta bestea abuztuaren 2an, biak Zalgizen.

Pastorala herri antzerkia da, herriko jenteak antzezten dauena, urte bakotxean herri baten. Oso araututa dauka jokabidea: personaje multzo bi, onak eta txarrak; kantuak eta dantzak ondo bananduta; banakoak eta taldekoak tartekatuta.

Tradizino handia dauka Zuberoan eta herri guztietatik jente asko inguratzen dabe. Beti landa baten egiten da eta jai-egun ederra sortzen da horren bueltan.

Pierra Lhande abade, euskaltzale eta hizkuntzalaria izan zan, lanik ezagunena euskera-frantsesa hiztegia dauena (1926). Haren bizitzaren barri emongo dabe antzerkiaren libretoaren bitartez.

Esatekoak 0
Ikusita: 992
2015.07.23

Bertsolaritza aztertzeko sarien deialdia

Mintzola Fundazioak eta EHUko Mikel Laboa Katedrak 2015erako deialdia egin dabe bertsolaritzari buruzko ikerketa-lanen eta master amaierako lanen proiektuak bideratzen laguntzeko. Beraz, ikergai nagusia bertsolaritza izan behar dabe proiektuok, edozein jakintza-alorretatik aztertuta.

2015ean 2000 euroko hiru diru-laguntza emongo dira.

Master-amaierako lanen proiektuek lehentasuna eukiko dabe, baina beste ikerketa-lan monografiko batzuk be onartuko dira, geroko tesiak bultzatzeko helburuagaz, horreen ikergai nagusia bertsolaritza bada. Edozein kasutan, unibersidadeko irakasle doktore batek bermatu behar dau proiektua.

Informazino guztia helbide honetan: http://www.mintzola.eus/bertsolaritzaren-ikertegia/ikerkuntza/ikerketa%20kontratu%20eta%20proiektu%20sariak/ikerketa-proiektu-sariak-2015

Esatekoak 0
Ikusita: 729