kontaktua
2013.05.02

Mendebalde Alkartearen XVII jardunaldiak

Aurten be Mendebalde Kultura Alkarteak jardunaldiak egingo ditu, maiatzaren 3 eta 4an Euskaltzaindiaren egoitza, Bilboko Plaza Barrian.

Aurten kirola izango da gai nagusia, euskerea eta kirola buztartuta. Horren ganean berba egiteko, hizlari aituak eta goi mailakoak egongo dira: Pedro Mari Goikoetxea, Jose Ramón Uriarte Katxin, Dabi Piedra, Abel Barriola, Koikili Lertxundi, Maider Unda, besteak beste.

Urteroko moduan, omenaldia egingo da aurten be, kasu honetan Jose Angel Iribarri.

Esatekoak 0
Ikusita: 793
2013.04.25

Berba-probak jokatuko dabez Sopelanan eta Mungian

Urteroko jarduera bihurtu da honezkero Berba-probak egitea. Aprilaren 27an Sopelan eta maiatzaren 4an Mungian izango dira.

Parte hartzeko baldintzak iragarrita dagoz, zer prestau behar dan be jakina da, bakarrik falta da entrenementu apur bat eta taldeak animatzea giro ezin hobean eguna pasatzeko.

Euskera zabaltzeko eta suspertzeko egiten dan ekitaldi hau honezkero finkatuta dago.

Esatekoak 0
Ikusita: 913
2013.04.12

Idatz & Mintz literatur aldizkariaren 54. zenbakia

Labayru Ikastegiak argitaratzen dauen Idatz & Mintz Literatur Atalen sorta aldizkariaren 54. zenbakia kaleratu barri da. Eduki ugari dakar, dala sorkuntzan, dala azterketan eta saioan.

Jabier Kalzakortak artikulu bi egin ditu, batak “Balada gai biren ereduak ‘Plazan zer berri da?’ eta ‘Alhargüntsa’” dauka izenburua; eta besteak, “Basoilarraren khantorea”. Aldaera ezezagun zoragarriak dakarz oraingoan be, gure tradizinoko kantutegiko pitxiak. Horrezaz gainera, testuok hobeto ulertzeko eta gehiago gozatzeko balio daben hainbat ohar interesgarri emoten ditu egileak.

Poesia atala dogu zenbaki honetan ugariena, lau ekarpenekoa. Eneko Urizarrek “Metroko poemak laburrak” idatzi dau; Miren Agur Meabek ‘Iloba’ eta ‘Itxaroten’ poemak; Eukene Martinek “Barakuiluen erregina” eta Luigi Anselmik “Olerkiak”. Miren Agur eta Luigi aldizkarian ohikoak baditugu be, Enekok eta Eukenek lehenengoz agertu dabez euren idatziak Idatz & Mintz aldizkarian.

Narrazinoetan, Amaia Iturbidek “Bezatzailearen itzala eta zauria” izenekoan, ohikoak dituan gai eta egoeretara jo dau oraingoan be. Iratxe Ormatzak “Gandua” izeneko narrazinoan giza hartu-emonen tentsinoa garatzen dau.

Amaitzeko, Sebastian Gartzia Trujillok “Zaharrak… berri” izeneko artikuluan, euskal testu zaharren balioak eguneratzen ditu.

Esatekoak 0
Ikusita: 912
2013.04.05

Garaiko ohitura-dantzei buruzko liburu barria

Jakina da Garain dantzak tradizino handia daukala eta dantzari onak eta asko egon izan dirala herrian. Bertako Otea Loran alkarteak Garai: ohiturak, dantzak eta jaiak liburua argitaratu dau, dantza eta ohitura horrek jaso eta ezagutzera emoteko. Liburuagaz batera, DVDa jaso dabe, Bizkaiko Jantzarien Biltzarreko Jon Gamindek atondutako dokumentala.

Iñaki Irigoien eta Uxune Martinezen testuak, Txelu Angoitiaren argazkiak eta Jon Gaminderen irudiak batzen ditu liburuak. Otea Loranek 2009an hasitako proiektuaren emoitzea da.

Esatekoak 0
Ikusita: 864
2013.03.27

Bilbo eta Bizkaiaren izena Himalaiara eroango dabe Txikon, Madariaga eta Tamayok

Alex Txikon, Juanra Madariaga eta Jose Carlos Tamayo Himalaiara bidean dira honezkero, Azkue Fundazioak babestuta, euskerea gailurrik altuenetako batera eroateko, Bizkaiko Aldundiaren eta Bilboko Udalaren izena zabaltzeaz batera.

Menditik harago doan alkarlana da hau, handik bueltan, hiru mendizaleek euren bizipenak kontauko dituelako, euskeraz jakina. Berbaldiak, topaketak eta antzekoak antolatzeko asmoa daukie, euskerea ez eze, teknologia barriak be erabili eta bultzatzen dituela.

Alex Txikonek lankidetza hitzarmena sinatu dau Azkue Fundazinoagaz. Holan, espedizino hau ez eze, aurten bertan K-2ra egin gura dauena eta 2014an Everest, Kangchenjunga eta Nanga Parbatera egingo dituanak babestuko deutsoz. Trukean, Txikonek bere abenturen barri emongo dau euskerea eta teknologia barriak erabilita.

Esatekoak 0
Ikusita: 896